لماذا خلق اللهُ الناموس ؟

لماذا خلق الله الناموس ؟ سؤال مهم ، لازم يلاقي له إجابة جامعة عُمّالية ، مانعة للتسرب و للعكننة في الظلام . خلق الله الناموس لإنه ضروري ، ضروري يكون فيه ناموس ، صحيح هوّ _ الناموس _ عايش على دمّك ، بيمصه يا أخي و لا قحبة في فيلم سكس _ دمّك _ و بشبق حقيقي المرة دي ،  شبق نزق تمر هندي ، ما علينا ، الناموس كما ذُكر أعلاه إنه بيتغذى ، غذاؤه الرئيسي دمّ ميتين أهلك ، و لإن غالباً جلدك مش ميّت غير في كعوب رجليك ف جسمك بيفرز هيستامين و تبدأ تُهرُش ، الهرش / الحكة حلوة بس و بعدين ؟ احمرار في الجلد و خربشة و دمّ ، طارت الناموسة يا عيني و إنت اللي طلع دين جلدك الحيّ المرة دي كمان ، و بإيدك ، لا بيد عمرو . نرجع و نقول إن الناموس بيمُص دمّك ، لُه خرطوم مش باين للعين المُجردة و لا المزيدة ، لا للعين المجردة ولا للعين الانطباعين حتّى ، خرطوم زي بريمة الحفّار ، نازل و عاقد النية يطلع ببترول من مجرى الدمّ . بتهتاج عصبياً لما بيحقق الناموس غرضه ، و يحببلك جسمك ، سيادتك يجن جنونك ، تطير في فضاء الغرفة بفردة شبشب زنّوبة أو خدوجة و تلزق الناموس ع الحيطان . انتصار عظيم ساحق و ماحق / سابق و لاحق .انتصار يُسجّل باسمك في موسوعة غينيس تحت لقب قاتل أكبر عدد من الناموس ، مش هيكتبوا أي حاجة عن منظر الجدران بتاعة القوضة بعد ما جثامين الحشرات رشّقتها بدون نظام ، دمّك _ سابقاً _ اللي إنت بكامل قواك العقلية طبعته بكفّ إيدك ، و بالشبشب على الحيطان . فيه حلّين ؛ واحد و هو واقعي و هو قزازة بيروسول مش هتعمل أكتر من تأخير تقدم الناموس في امتصاص دمّك . التاني هو طفي نور الغرفة و توليع نور الصالة على أمل إنهم _ كناموسات _ هيتوجهوا في فوج نضيد إلى باحة الصالة . فيه حل واحد شرطة و هو إنك تسيب الناموس و ترضخ و تنام في مكان آخر خالي من الناموس ، أو إنك تعزّل من البيت و تسيبه للناموس ، أو إنك تنتحر و تسيب الناموس يشرب دمّك كاملاً ، فيه حلول كتيرة كتيرة كتيرة ، و ثبت بالتجربة إنه مفيش واحد فيهم فعّال قد لزق الناموس بالشبشب ع الحيطة . 

حلم .

بصيت في المراية وجدت نفسي ساكن ، شاورت لها و هي تقلانة أو تقيلة . كان الموقف يستلزم حكيم عيون أو دجّال غير أن ما باليد حيلة لقصرها و ثبوت أن العين بصيرة . العين بصيرة ؟ و ربّ العرش نجّاني . الإيد قصيرة ؟ الإيد قصيرة بلا US AID و احتمالات الإصابة بالAids بدون ملامسة أو مُجالسة . نفص المناعة ورايا وريا و أنا يا حبيبي ما فيه سوايا . دخلت مرة ف مراية و طلعت منها سالم و دخلت مرة ف جنينة و خرجت منها تاني . أينَ المتى ؟ مُعجم و صالة و ربع علبة سجاير في ركن المُكعب الأبيض . أيها الراقدونَ تحت التراب خُذوني معكم . ليسَ في الأكشاك علبة بوكس . كسرت المرايا و عوّرتني شظية . الدم ناقص و الحياة تتمة . شربت كاس المُر لم اُستَشر . آه يا بشر يا مرض و انتَشر . سلخت نفسي بصفيحة الموسّى . رسمت باقي الجثّة على بطني . نضّارتي وقت الظهيرة بتطلع رنين مكتوم . سألت إيش السبب ؟ قالوا البصل و التوم . رجّعت باقي الحلم لتاجر الجُملة ، غنيتها ع الطبلة بإيقاع مقسوم . ركّبت باقي المراية على مهلي في الضُلُمات ، و صحيت سعيد من غير عُماص في النوم .

Bang Bang بالعربية !

1

أنا كنت خمسة و كان هيّ ستّة .
لمّا ركبنا حصانين من خشب .
لبست شاموا و هي لبست بفتَة .
و كنت دايماً أنا اللي انضرب .

         

قنصني حبيبي و وقعت زرع بصَل

و صوت الرصاصة فكّرني باللي حصل

قنصني حبيبي

ووقعت زرع بصل

2

دارت الأيام و راحت لياليّا

وامّا كبرنا سوا قلت لحبيبي

مفيش سواك ليا

ضحك حبيبي و قال لي فاكرة

أيامي الخواليّا

قنصته حبيبي وقعته زرع بصل

صوت الرصاصة ذكّرهُ باللي حصل

قنصته حبيبي

وقّعته زرع بصل .

عليّت المزّيكا و غنّوا الناس

و لاجل خطري في الكنيسة

دقدقوا الأجراس

3

سافر حبيبي مااعرفش سافر ليه

من يومها و أنا طول النهار بابكيه

سافر حبيبي ما سابش أي وداع

 ما كدّبش الخبر ، ترك هواه و لياليه .

قنصني حبيبي و وقعت زرع بصَل

و صوت الرصاصة فكّرني باللي حصل

قنصني حبيبي

ووقعت زرع بصل .

معاجلة و تمصير : أبو علي .

الأغنية الأصلية :

فرانك سيناترا : http://www.youtube.com/watch?v=AGfVeCspmDs

نانسي سيناترا : http://www.youtube.com/watch?v=U2LAdyE8lEU