1
كَ بَشَاعِةْ دمْ ، و بكارة أُمْ ، و فَرضية واقعْ ، ورَشاقِةْ موت ، وترابط أهلي ، ومراهقة كهلي ، وذهاب بلا رجعة ، وسموم مش ناقعة ، وأصفر مش فاقع ، وأحمر ما قَنَاش ، و ك كون ما فناش ، و أحلام كِلْكامش ، و بَسِيْطْ كَالْكامِشْ ، و الزمن النابت ، و سُْخْرِية الثابت ، والعهر الأزلي ، والكدب الغزلي ...
و كَلِيْلْ ، وكَرِيْمْ ، وكَذَاْ .
وكَ مللك المَنْطِقي مِنْ كُتْرْ ال"كَ" ..
وكَأنْ كلامي ده مش مِلكا
مش ملكا لي ...
وخيالي ده..مشروع قتله .
أو دخولك له بشكل أو بآخر .
2
الشِّعْرْ _ وده مش بيان أو نظرية أو أطروحة أكاديمية ، مش مانيفستو فْ "شِعْرْ" ، ولا نوع من أنواع الهجاء المستحدثة أو المستأنسة _ هو اليوم اللي ما وردش ذكره ف سِفْرْ التَّكْوينْ ، وكتاب مقدس لنبي واحد ، وحواريين بعدد الدَّمْعْ الناشعْ من عين موسي ، وكفرةأطول قامة مِنْ "إفرست " .
الشِّعْرْ .. عَبَثُوتْ الشخص ، وهَبَلُوتْ الجَرْحْ ، ومَلَلُوتْ المَللْ .
مِشْ كَ
الشِّعْرْ مِشْكَاةْ .
3
للذينَ بيزعلوا مِنَ "الإبهام" في أي نص ، أنا مقتنع تماما إن الإبهام هو أن الواحد يترك بصمته ، فالناس بيختموا ب"إبهامهم" .
ولو كان "إبهامي" سببا لغضبهم ، أرفع في وشوشهم ..الوسطي .
4
طالع من تحت صوت إديت بياف ، عم يتخبط بِنُهاد حداد ، في طُرقَةْ مِنشاوِيةْ .
5
... وقليلٌ مِمَّا يَعْقِلُونْ .
وأكْثرهم لا يشعرون .
6
مصابة بعدةأمراض طاعنة في الموت الأزرق والفوسفوري ، و سببها لا يعلمه إلاها ، ضغط البَحْرْ وحَمله ف كيس .. مُمْرِضْ .
فلترة الثواني من دقايقها محتاج تركيز كافي لحرق ثيابك في المعمل .
أجرة بالساعة بتدفعها للعدم يوميا ، محتاجة ساعات وقود أكتر .
لِذا ..
فَمَرَضُهْا الأكبر .. مش سَرَطان الثَّدْيْ ، اللي بيحرجها عند سماعها " ها اليومين " .
مَرَضْها الأكبَرْ ..
قُدْرِتْها عَ السُّخْرِيَةْ ، عَشَانْ ماهيَّاشْ أُمْ !
7
عَنْكَبُوْتْة مَعششة علي طَرِيْقْ الخُصُوبَةْ ..
وصفيرها ترجمته فيما معناه :
أن العبقرية مِشْ ضخامتي .
العبقرية هي قدرة الأعزل علي مقاومة الأرملة
السودا
بالسائل الأبيض !
8
بلاغك بانتهاك شرف القصيدة ماهوش محتاج جرس لتحذير الكائنات ، إنُّو "يا قَوم اسمعوا" ،
عَشَانْ الكلمة ما بتتفضِّشْ ، ولا هي سَما دُنْيا بْتُخْتَرَقْ عُنْوَةْ ، ولا مُتْعَةْ مُسْتَوْرَدَةْ .
الكِلْمَةْ ... حِيْضْ المَعِيشَةْ بينزِلْ ..مُفْرَدَةْ ، مُفْرَدَةْ .
9
أَقْرَبْ لِ اللا مَنْطِقِيْ ، مُحَاوْلِةْ عالم فيزيا ، أَدِيْبْ ، إنُّو يْحْفَظْ فُقَّاعِةْ كونه ، وإنُّو يمنع الأهْوَجْ فيه عَنْ رَشْ بُرَادتُه علي عوالم مفترضة .
وِلا مَنْطِقيْ .. " مِنْ وِجْهِةْ نَظَرٍ ما " فِعْلْ شَخْصْ بلغته ، لمَّا يفضيها مِ الهَوا
بِمُبَرِّرْ ..
إنُّوْ مِشْ مِنْ دَرَاوِيشْ الهيليوم !
10
سِفْرْ الضِّحْكْ الآثِمْ :
هَعْ . هَعْ . هَعْ . هَعْ
هَلْ تَتَسائَلْ عَنْ جَدْوَيْ هَذَاْ المَقْطَعْ ؟
بَعْدْ جَفْافْ رِيْقْ الحَرْفْ مِنْ ذاكَ النَّصْ المُدْقِعْ ؟
هَلْ _ بَعْدَكْ _ مِشْ عارف تَخْلَعْ عَنُّهْ البرقُعْ ؟
مَعْلِشْ
اعذُرْ صاحبُه إن كان مَصْرُوعْ
اعذُر وَعْيَكْ لو كَانْ أَكْتَعْ !
هَعْ . هَعْ . هَعْ . هَعْ
