هوامش هيستيريّة غير مرتبّة حسب
الأبجد هوّز .
(1)
الإنسان الحالي حياته تم تدميرها ،
تهشيمها بالكامل بسبب مواضيع التعبير . إكسكيوز مي .. المقالات ، إكسكيوت مي (
إعدمني ) ولا تخلّينيش أقرا مقال طويل أو قصير بس يكون مترتّب . فيه عتّة أكّالة
في شغفي الخاص لو جيت أقرا مقال ، و مُعدية للغاية يعني ، لدرجة إن الطبيب منعني و
ربّ العرش نجّاني . نجّاني _ ورب العرش _ قسم برب العرش _ من العدوى المقالية ،
فيروس و بكتيريا و جراثيم كتيرة مرتبّة بالطوابير و التتابع . كوليرا ، طاعون ،
وباء والله ، وباء .. باءَ بالفشل و الملل علي حدٍّ سواء . ( مالية الجرايد
إعلانات ) علي حسب أغنية " مسار إجباري " . مالية الجرايد إعلانات و
مقالات كلها بتقول فكرتين تلاتة بالكتير و بأسلوب واحد و تحت التلات أفكار تلاتة
فيه عدد لانهائي من الأسماء . لدرجة معها تحسّ _ عزيزي القارئ _ إن صاحب المقالات
السرطانيّة رجل واحد يعمل لحساب المافيا الإيطالية و يتقمص جميع الأدوار لأجل
مصالحه الخاصّة .
معقولين الناس دول ؟ لأ مش معقولين
. مش معقولين رغم إنهم بيكتبوا عن المعقول و المفروض و المنطقي ، و بيحاولوا طيلة
الأيام يكونوا مش معقولين ، و الطريقة المثالية لفعل دا إنهم إمّا أوْ . إمّا
يكتبوا بأسلوب المعقول و اللعب علي تكتكة المنطق و بمنطق مدير الحسابات . أو
بمنطق الدقّ علي القلب بخرزة زرقا و
استجداء الأدرينالين و الدموع . عالَم عايشة وسط صورة فيها فريقين بيلعبوا
"شدّ الحبل " . الفريق الكسبان هوّ اللي بيشد التاني ناحيته ، حتّى لو
الفريقين بيقعوا علي الأرض في آخر الشدّ و الجذب و المدّ . كانوا قادرين يلعبوا
" نطّ الحبل " و يعلوا عن الأرض و الجاذبية و لو لأجزاء من الثواني .
صحيح بتشدهم في آخر الأمر و عليه بتبقي لعبة فيها عقبة منطقية ، عقبة طبيعية مش
اسمها الجاذبية الأرضيّة . لعبة آمنة تماماً باستثناء بعض حالات ( اللعبكة ) في
الرجول ، حالات لعبكة بتأكّد إن عجلة الجاذبية الأرضية مش بالضرورة تبقي 9.8 متر مربّع في الثانية بالزبط و الربط طبعاً لازم يبقي فيه استثناءات . علي
العكس من العدوّ الأرضي البشري المصطنع في "شدّ الحبل" .
(2)
لو شخص كتب ما مضمونه إنه بيحب
المرأة فَ الستّات _ أحياناً كتير _ بيحبّوه . و لو انتقد تصرفات بتعملها الأنوثة
في الحال هيتقال عليه سطحي و إنه رجل و كيف لرجل أن يكتب عن امرأة . لو الأديب
المشهور خد موقف سياسي ما و ثبت غلطه يطلع الصحافي المشهور و يتكلم عن صراحة
الفنان المشهور في اعترافه بخطئه .لو الفنان المشهور خد موقف ما و ثبت صحته يطلع
الناقد المشهور و يتكلم عن بُعد نظر و بصيرة الفنان المشهور . الصحافي المغمور
هيكون بيشتم في الصحافي المشهور و الفنان المشهور و الأديب المشهور علي حدّ سواء ،
أملاً في أن يكون مشهوراً . وساعتها ترجع تروس الساعة لنقطة البداية و كأن شيئاً
لم يكُن و كأن أحداً لم يؤذّن في مالطة بسبب كونها مش مشهورة .
(3)
جفنُهُ علّمَ الغزل ، لكِ يا سيدتي
، لَكِ سترايك ( ضربة الحظّ _ سجاير ) ، لَكِ الله و عليكِ العَوَض . للهِ درّك يا
مادموازيل ! شرابات كولون خداعة . كميات من الكحول مع القليل من أصل العطر ، لدرجة
توحي بإن الموضوع للشرب . خلطبيطة من الألوان و الأحزان و قيء الأزياء . انتفاضة
المرأة العربية و لا للتحرّش . نادية الجندي vs
سينما محمد دياب . آثار الانسحاب و أثار الانسحاب سخطاً . الأفورة _ المينستريم
كعناوين عريضة و كظاهرة طبيعية أو صناعية . حتّي هذه الساعة المتأخرة من الليل
الناس تعمل لقاء المال . لا للتحرش و لنادية الجندي .
