تحذير/ لِلْكِبَار فَقَطْ ...الوجع أكتر فِ الكُبار!!!
الوجع بيزيد ومش قادر أوقِفُه دلوقتي ليه الذكري المِهَبِبَة دي تحِل عليا دلوقتي ؟
أنا باحاول أنسي ، وأحاول أقنع نفسي إن كله أخضر وجميل ، بس الأحمر إيه اللي دخله فِ الموضوع دلوقتي ؟
الاعتياد،التكرار، ملعونٌ أبوه... ملعونٌ أبوه ميت ألف مرة..
ها وإيه العِلاقة ؟
لو بِتِتْفرج علي "سبيس تون" كتير،هاتِدْمِن لعبة "الرَّابط العجيب ".
أنا مش باهزر خالِص ، ولا باضحك ، ولا فيا حيل أضحك...
الحكاية باختصار ،إن أول ما جت كلمة اعتياد فِ دماغي ،افتكرت ال present simple وأدواته
وف أقل من ثانية لقيت always بِتْرِنّْ فِ دماغي ..
حاولت أحلل " صوت " الكلمة ، لقيته يُتَرجم كالآتي " كل الطرق " .. مش محتاج أكملها ..
بِتأدِّي كلها لروما ، وبتأدِّي نَفْس الدور في سِلسَال الغَبَا ، النهاية واحدة
..إخص علي كده!
الكلمة نفسها لُغَةً معناها " دائما .. بصورة دورية ..إلخ" التكرار ساكن ف رسم الحروف وف كيانها و تركيبها...مش باين غير كده.. !
لو كان الأمر توقف عند كده ...كنت ممكن استحمل وأتَجَاوَز عن الأمر .. بس الحكاية أكبر وأبشع وأفظع بكتير .
المنتج الأشهر في العالم، لأنه مرتبط بتركيب العالم نفسه ..
"أولويز"
مع إن الكلمة ما اتغيرتش لا هجاءا ولا معني ، ولااصطلاحا ايضا...
بس المرة دي وجعتني وهزتني ،
"أولويز "
أشهر ماركة فوط صحية ف العالم، معروف بتستخدم لإيه ...
دم..دم..دم..
كل ما أتخيل كَمّْ المعاناة والوجع اللي بتعانيه الأنثي بسبب الحكاية دي ، باكره الدنيا والحياة ، وتصعب عليا الأنثي...
النقط الحمرا الموجودة ع السرير ، نفسها الموجودة علي نفس السرير عشان أنا آجي!
يادي القرف !!!
أنا جيت من دم ، ومشوار حياة اللي حواليا مرتبط بالدم .
والدم ده،
أولويز
دم معتاد،
قرف متكرر،
شهريا، تتكرر نفس المآساة ، نفس الوجع...
يا أُم سخرية القدر ، عشان أنا آجي ، لازم الإنسانة دي تجيب دم!
وعشان ما اجيش ، تجيب دم برضو؟!!!
يا أم العبث الدُنَيوي..
يا أم العَبَثْ المعتاد..
يا أم العَبَثْ الأولويزْ...!!!!
ليست هناك تعليقات:
إرسال تعليق