1
فاكر إن عيد ميلادك في فبراير ، فقلت أهاديكي ، هو صحيح كلام ، بس هو أنا من إمتي كنت باعمل حاجة غير إني باتكلم ، معلش ..أنتي عارفة إني مش معايا فلوس ، يمكن ربنا عاوز كده ، علشان لما أقوللك " بحبك بلا ولا شي" ...تصدقيني .
2
علي فكرة .. إنتي واحشاني قوي .. وزعلان منك قوي ، وزعلان من نفسي قوي قوي .
زعلان منك ، عشان قولتيلي " واحدة واحدة هتنساني " ، وماحصلش . وكمان عشان ما أزعلكيش ، سمعت كلامك وحاولت ، بس برضو ما عرفتش ، فَ زعلان عشان ما عرفتش اعمل حاجة كنتي إنتي عايزاها مني .
3
طمنيني عليكي ، لسه ضحكتك بتطلع الحي من الميت ؟ ، ولا بقت زيي ؟ ، لسه بُكاكي مطهر طويل المفعول .؟ ، وبيغسل أي قلب من كوليسترول الزحام ؟ لسه ؟
4
بالمناسبة : فاكرة أول مرة نتكلم ونتشد لبعض كنا بنتكلم في إيه ؟
أفكرك ..
جلجامش ، آه ، جلجامش وصاحبه " أنكيدو" ... وكنت ساعتها باهزر واقول " والنبي ل_أنكيدو_العزال" :)
جلجامش زعل قوي وجاله اكتئاب لما أنكيدو مات ... صح ؟
أنا عامل زيه دلوقتي .
بلا أنكيدو
صحيح عرفت ناس كتير وحبيت ناس كتير ....
بس مازلت جلجامش بلا أنكيدو .
5
كان المفروض تبقي إنتي أول شخص أشوفه لما آجي القاهرة ، بس بعد قرارك المشئوم ، وبعد فترة اكتئاب مرحلة أولي ،تطورت والحمد لله دلوقتي لاكتئاب من مراحل كتير وأنواع أكتر ، جيت عشان المدينة الجامعية والكلية وكده .
أول شخص باحبه قابلته كان " زكريا " ، ما تعرفيهوش ، بس لو عرفتيه هتحبيه .. ممكن تستغربيه ، ممكن تضايقي منه ، بس أنا متأكد أنك هَتحبيه ، عشان هو ف نضافة دموعك ...
6
آه صحيح ، جالي جُذَام " اجتماعي" ، الحتت اللي مش حابَّاها فيا وحواليا ، بتقع لوحدها ...فهمتي قصدي طبعا ؟
7
ممكن تسامحيني في اللي هقوله ده ؟
ساعة ما كنتي في رمضان صايمة وبتحفظي قرآن ، أنا كنت ف قمة شكي في كل حاجة ، معلش كدبت عليكي ، بس مش خوف منك ، لكن عشان مش عايز اجرحك .
لما بعدتي قوي .. زي ما يكون ربنا " من كتر طيبته " .. سابني شوية ، فحسيت نفسي مش مؤمن ، يمكن سابني عشان كنت محتاج ابقي لوحدي خالص ...
بس لما بصيت للسحاب وأنا داخل باب المدينة بالليل ، وصرخت وانهرت تماما ، بدأ يقربلي ، ويدلق "صبغة يود" علي قلبي ، ولَفُّه بشاش ، وباسني فيه ... ساعتها قلت : " أكيد إنتي كويسة".
8
معلش ، كمان مرة ...لسه باشرب سجاير ، بس ولله "العظيم" ولله العظيم ، وحياتك عندي ...هابطلها قريب.
9
أنا عارف أن عينيكي عايزة تبكي بس مستنية منك إذن ، سيبيها عشان خاطري ، عشان إنتي عارفة إن أنا كمان سايبها دلوقتي ... ويمكن مش عارف أكتب الكلمة الجاية عشان الورقة اتبلت .!
10
رغم إني لسه شكاك ، في كل حاجة ، بس عندي يقين غريب ، أكتر من يقين مؤمن شاف ربه ، إن أنا هاشوفك ..ما اعرفش امتي وازاي .
11
بوسيلي شَعرِكْ وملسيلي عليه قوي ، ما تقلقيش ...ساعتها الأدرينالين هيزيد ، وهلاقيني فرحان.
12
سلام ..علي حبك يا سلامِ ...........
ليست هناك تعليقات:
إرسال تعليق