1
مَعْرُوف إنّي غير مُهْتَم بالوَطَن ، ومشاغلِه ، عندي مِنَ الهموم ما يصيب الشَّمس بالانفصَال الشَّبَكِي ، أحاوِل أن أحصر أسباب "عَيَفاني"الحالي للحياة والمخاليق الغير خليقة بالخَلْق والله ، في المال و الناس ، و تناسي الوَطَن السَّبَهْلَلِي النَّزْعَة منذُ القِدَم .. تَقَمَّصْت دور " رَشيد " _ملِك السَّاحة اللبنانية عَ بياض منذ زَمَن ليس بالمُتجَاهَل ، و عايشها بِمنطِق "اللحم بعجين "، لكن يبدو إنّه طَفَح الكَيْل ، وبَلغَت الحُلقُوم ، آسِف علي إزعاجكُم يا سادَة ، الحالة "جيم" وَلَم يَعُد في جُعبَتي أي قدر مِنْ الاحتمال أو الاستعباثْ .
2
مِنْ زَمان ما اتْكَلِّمْتِشْ فِ السياسَة ، بَسْ الموقِف خلاص يعني ، أنا مُضْطَر اقول للحُكومة ، للمَجْلِسْ العَسْكَرِيْ ، للإخوان ، للمنتفعين أيَّانَ كانوا ، الوِسْخِين في كُل زمان ومكان : " مِتِل ما عَم قِلَّك .. عَم بتحُطَّها _ الهاء سايلَنت _ فيي ، كَوْنَك شَيْخ الكافْرِين " ، بَسْ .
3
الحالِة تعبانَة يا ثَوْرَة ، دَولَة مَفِيْشْ
إنتي حقيقة يا ثورة ؟ ولا تَهْوِيش ؟
.....................
لماذا قُمنا بالثَّورَة ؟ ، استقر الأمر علي إن مالهاش سبب مُحدد ، ما بين الحرية ، والخُبز ، والكرامة ، والثورة علي "النِّظام" ، لَكِن أوَّل شي كان لازم يكون في " نظام " تاتِعمِل ثورة عليه ، زي ما بيقولوا فِ "العَقْل زينَة " ، وأنا مشْ حاسِسْ غير إن في فوضي عارمَة للغاية حاصْلَة ،بمعني إنوإحنا كرهنا حُكم مبارك الديكتاتوري ، و حاشيته "الوحشة خالص" ، ونسينا أو تناسينا إن مُبارَك أصلا مِن الشَّعْب ، فَمِشْ مَفْهوم ازاي نعمل ثورة علي مبارك ، وعلي نظامه وإحنا نفسنا ما اتغيرناش ، كلام سلمي
مُهادِن ، أنا معترف ، أنا مِشْ معترض علي قلب نظام مبارك علي وجهه ، بس معترض تماما علي جَو " الثورة أولا " ، لأ "الدستور أولا" ، لأ "الفقراء أولا يا أولاد الكلب " ، لأ " المحاكمة أولا " .هو أولا و أخيرا .. كُل الحاجات دي ما فيهاش أولا و أخيرا ، عشان مافيش مانِع يشتغل الكُل في كُل الاتجاهات في نَفْس اللحظَةْ .. كُنَّا هانحِسْ ساعتها بشئ من الجِدَّية في الأمر .
4
مِنْ أوِّل الدنيا ، وأنا ماكُنتِشْ مقتنع ب"عصام شرف " ، حَدْسي ما ريحنيش ، بَسْ مِشي الحال ، وقالوا ما تقلقوش ده هيبقي شطور ويسمع الكلام ويخلي كُله فل ، بَس ما حصلش الهوا ، لا مصر بقت وحدة وطنية ، ولا السلفيين بطلوا يطلعوا دين أبويا ، ولا أي حاجة حصلت ، والناس بتموت من القلق
والانتظار ، وماحدش يعرف جو الأقاليم المصرية والاشاعات ف كل حاجة عامل ازاي .
5
البلطجية مِشْ أحسن من المجلس العسكري ، وده اللي شرخلي زوري ، و الإخوان مش أرحم من السلفيين ، والبابا مش موافق علي زواج مدني ، والحويني مش موافق ع المسيحيين ، والمسيحيين مش موافقين علي يوسف زيدان ، و بتوع المدينة الجامعية مش موافقين عليا ، وأنا مش موافق علي المدينة
الكبيرة الأرضية .
6
الشُّهَدا مِشْ بيقِلُّوا ، بيزيدوا كُل يوم ، بَلْطَجة ، و فقر ، و أطفال بيغتصبوا ويندبحوا ، الأرض بقِت حَمْرا ، بقا كوكب أحمر ، والموت ما عادتش مُريح ، ولا العيشَة ،مع ملاحظة إن في مشكلة فظيعة إسمها "السياسيون الفراغيون " ، نضال ف أوقات الفراغ ، تتضيع وَقْت ، الموضوع ممكن ما
يبقاش جدي بالنسبة لهم تماما.
7
يعني إيه تدافع عن " مبارك" ؟ ، يعني إيه تدافع عن الدول الدينية ؟ ، يعني إيه تدافع عن دولة شمولية من أي نوع ؟ ، يعني إيه الناس تتطلع تتخانق ع التلفزيونات والراديوهات وسنترالات التليفونات ؟ هي دي حرية؟ يعني إيه نُص اللي كانوا بيقولوا احنا تبع الثورة ، يطلعوا عُملا ؟ ، يعني إيه كل اللي كانوا ضد الثورة يبقوا مع الثورة ؟ ، يعني إيه تبقي خمسة وعشرين يناير أرخص من اللبانة تشكلس ف الفُمُوم ؟ كُل مِن هَب ودَب يقول " أنا ثورة " ، يعني إيه مبارك لسه ما تحاسبش ، يعني إيه القذافي لسه عايش ؟ ، يعني إيه فرح الأمير ويليام يتذاع ع التلفزيون ؟ ، يعني إيه شام إف إم بطلت تذيع فترة الفيروزيات ؟ ، يعني إيه ؟
8
الإخوة أصحاب الأحزاب والتيارات الدينية ، إسلامية أو مسيحية أو حتي ألتراس بترول أسيوط ، إيه بقا ؟ ها؟ هو إنتو ما بتحرموش؟ إنتو ما زهقتوش؟ ، هو إنتو عايزين فرج فودة يفضحكو من جديد وتقتلوه
؟ بَسْ علي كُلٍ علي كُل حال ، يعني بكل الأحوال يعني ، ليكو حَقْ تتمرعوا ، ماهو ربنا رازق البلد بكمية مخوخِ ، بنت كَلِب ، وأرجع وأقول ازاي يبقي النظام بيدعم الإخوة الإخوان ، وبينشر كتب "التنوير" وما شابه تبع الهيئة العامة ؟ هو في إيه ؟
9
مش عارف أكتب " لولا فسحة الأملِ " ولا ابقي زيي زي "إحنا آسفين يا ريس " باكدب
....
تَعِي نِقْعُد بالفَيْ
مِشْ لحدا ها الفي
ولا حتي الثوار !
 |
| خَلَصْنااااااااااااااااااااااااااااااااااااا |
ليست هناك تعليقات:
إرسال تعليق